Skip to main content

Útgávutiltak: Nú kemur Føroysk bókmentasøga 2

07.03.2023

Fríggjadagin 10. mars verður útgávutiltak í Námi í sambandi við at Føroysk bókmentasøga 2 kemur út

Fyrsta bind, sum kom út í 2011, rakk til aldaskiftið 1900. Í hesum bindinum førka vit okkum inn í nýggju øldina, tá føroyska bókmentaøkið av álvara fór at blóma. Føroysk bókmentasøga 2 fevnir um tíðarskeiðið 1900-1939, og hetta tíðarskeiðið er stórur vøkstur í bókmentum, ikki minst veksur talið av tekstsløgum. Rák uttan úr heimi seta síni frámerki á føroyskar bókmentir, føroyskt mál tekur seg fram, og trúartekstir gerast føroyskir. Harafturat fær týðing alt størri týdning. Hetta er somuleiðis tíðarskeiðið, tá føroyskar barnabókmentir verða floygdar við søgum, sangum, barnablaði og myndprýðingum til børn.

Í hesum bindinum taka fagurbókmentir dik á seg. Hetta er tíðin, tá høvundar sum Hans Andrias Djurhuus, Janus Djurhuus, William Heinesen, Christian Matras, Mikkjal á Ryggi og aðrir stíga fram. Í bókini verða útgávur og verk lýst og greinað, sum kasta ljós á evni, ið hava upptikið føroyskar høvundar í eini tíð við kríggi, umfarsóttum og kanska eini tilveru í útlegd, men eisini við stórari samfelagsligari framgongd. Hetta var samstundis tíðarskeiðið, tá kvinnur fingu valrætt, og børn vóru viðurkend sum bólkur við bókmentaligum tørvi og áhugamálum.

Talan er um eitt stórt verk, sum telur knappar 800 blaðsíður. Malan Marnersdóttir og Turið Sigurðardóttir, professarar á Føroyamálsdeildini, hava lagt verkið til rættis og skrivað meginpartin. Aðrir høvundar eru Kirsten Brix og Leyvoy Joensen.

Bókin verður til keyps í bókahandlunum. Kostnaður: 498 krónur. Í sambandi við útgávutiltakið, verður bókin at fáa fyri 448 krónur.

Framløga verður í samband við útgávuna í Námi á Hoyvíksvegnum 72 fríggjadagin 10. mars kl. 15. Á skránni vera framløgur, yrkingaupplestur við Búa Rouch og sangur við Daniu Tausen.

Øll eru vælkomin.

Onnur tíðindi

13.03.2023

Nám takkar fyri góðu móttøkuna av 2. bindi av…

Les meira
07.03.2023

Fríggjadagin 10. mars verður útgávutiltak í Námi í…

Les meira
03.03.2023

At binda er ikki bara eitt stuttligt ítrív. At…

Les meira
24.02.2023

Nám sóknast eftir einum dugnaligum og ágrýtnum…

Les meira
15.02.2023

Leikritini "Hin politiski kannustoyparin", "Jeppi…

Les meira
14.02.2023

3. upplag av Ferð á føroyskt – sum annaðmál 1 er…

Les meira
31.01.2023

Nám sóknast eftir einum dugnaligum og ágrýtnum…

Les meira
27.01.2023

Her eru myndir frá holcaustdegnum, sum í ár var…

Les meira
26.01.2023

(Tíðindaskriv) 15. februar 2023 verður høvi hjá…

Les meira
19.01.2023

Á opnu undirvísingarsíðuni, Snar, er temasíða um…

Les meira