Nám er fremsti veitari til føroyska skúlaverkið, tá ið tað viðvíkur undirvísingartilfari. Útgávurnar eru til fólkaskúlan og miðnám, men talan er eisini um útgávur, sum hava breiðan almennan áhuga, so sum bókmentasøga og atlas.

Útgávur okkara eru grundaðar á fólkaskúlalógina, náms- og lesiætlanir og tey rák, sum eru á økinum, so at føroyskt undirvísingartilfar kann vera í fremstu røð.

Høvuðsvirkisøkini hava seinnu árini verið føroyskt, heimstaðarlæra, náttúra og tøkni, alis- og evnafrøði, søga, landalæra, enskt, lívfrøði, kristni og rokning til fólkaskúlan. Hetta arbeiðið heldur fram saman við nýggjum verkætlanum í serliga søgu og landalæru til fólkaskúlan og føroyskum til miðnám.

Høvðusútgávuvirksemið í Námi er skipað í Bókatoyminum. Á talgilda økinum arbeiðir Snar-toymið við egnum útgávum og verkætlanum saman við Bókatoyminum.