Ætlar tú at velta grønmeti í ár?
Áhugin fyri at velta grønmeti og framleiða egið tilfeingi til matna er vaksandi, og kring landið verða í vár skipað fyri skeiði í grønmetisvelting. Í hesum sambandi vilja vit minna á, at bókin Plantur til matna eftir Siggu Rasmussen longu er tøk sum netbók og hóskar sera væl sum fakligt grundarlag til slík skeið.
Skeiðsrøðin, sum Búnaðarstovan skipar fyri í samstarvi við Mat- og tilfeingishúsið, Veltuna, Matkovan og Rótina, fevnir um bæði frálæru og verkliga venjing – frá fornæling og forspíring til goymslu av grøði. Í hesum arbeiði gevur Plantur til matna eina greiða og føroyska innleiðing í, hvussu plantur vaksa og mennast, og hvussu vit røkta tær frá fræi til lidna vøru.
Leinki: Les meira um skeiðini á heimasíðununi hjá Búnaðarstovuni.
Bókin sameinir lívfrøðiliga vitan við praktisk ráð og er tí eitt natúrligt ískoyti til undirvísing, verkætlanir og skeið í grønmetisvelting og burðardyggari matframleiðslu.
Netbókin er tøk á netbókapallinum hjá Námi, og pappírsútgávan kemur út um miðjan mars.
Við bókini Plantur til matna fæst eitt føroyskt, dagført og læruríkt amboð til øll, sum vilja læra meira um plantur og matframleiðslu.
