Tíðindaskriv frá Granskingarráðnum

Fyri gransking hevur tað alstóran týdning at savna og skráseta dátur yvir tíð. Lutir, mátingar, skjøl, myndir, samrøður, upptøkur v.m., ið eru skrásett regluliga og varðveitt, kallast tíðarrøðir. Vísindaligar dátur av tílikum slagi gera tað møguligt hjá granskarum at greina og lýsa tilgongdir, sum hava týdning fyri, hvussu vit skilja fortíð og nútíð og at síggja møgulig rák, ið leiða inn í framtíðina.

Á Vísindavøkuni 2022 verða framløgur, framsýningar og tiltøk, ið á ymsan hátt lýsa týdningin av at kenna fortíðina fyri at skilja nútíð og framtíð. Dømir um gransking, ið byggir á tíðarrøðir, eru: Kanningar av hugburði og atburði hjá 9. floks næmingum, krígsfrásagnir fyrr og nú, kynsleiklutir, málnýtsla, veðurlagsbroytingar, gagnnýtsla av fiskastovnum v.m.

Vit vilja við hesum bjóða flokkum við lærarum at koma til tiltøkini, sum verða skipað inni og uttan fyri Løkshøll á Vísindavøkuni. Tiltøkini á Vísindavøkuni eru serliga ætlað næmingum frá 4. flokki og eldri. Boð um skrá og tilmelding koma seinni.

Lærarar, ið hava hug og møguleika at taka evnir upp í undirvísingini, ið hava tilknýti til evnið á Vísindavøkuni, kunnu fáa íblástur og tilfar frá granskingarstovnum.

Vælkomin á Vísindavøku!