Hjálpararbeiði í Afrika
Undir heitinum Hjartabørn í Kenja hava Niels Jóhan Sigurðsson og Rakul Ró Steintórsdóttir vitjað ein kenjanska skúla, sum er knýttur at felagsskapinum Mirjam.
Við sær høvdu tey myndatól, sum Niels Jóhan hevði undir hond, meðan Rakul Ró sigur frá og lesur tekstin frá ferðini.
Filmurin, sum varir 40 minuttir, byggir á heimildir frá fólkum tey møttu. Tey eru føroyingar, íslendingar og afrikanarar, og málini vit hoyra, eru føroyskt og enskt.
Úr filminum hava ritstjórar í Námi gjørt temasíðu, sum sæst á Snar, og er ætlað at brúka í hádeild í lærugreinunum landalæra, søgu, enskum og kristni.
Hilda Viderø stendur fyri Mirjam felagsskapinum. Í filminum hoyra vit hana siga, at tað er sum at vinna í lottarínum, sleppur tú í skúla í Afrika.
Temasíðan leggur upp til at næmingar arbeiða við Heimsmálunum hjá ST og skifta orð um týdningin av skúlagongd, rættin til bústað og javnstøðu millum kyni.
