Til ber nú at skráseta úrslitini frá yvirlitskanningunum, sum verða gjørdar í byrjanini av 3. flokki, í OneDrive. Nám umsitur atgongdina til hetta.

Á hátíðarløtuni, sum Orðblindalærarafelagið við Anniku Katrin Joensen, forkvinnu, skipaði fyri, fingu stjórin í Sernámi, Margreth Olsen, varastjórin, Harriet Hansen saman við stjóranum í Námi, Eyðuni Gaard og fyrrverandi stjóra í Sernámi, Emmy S. Joensen, sum nú er ráðgevi í Námi, tilfarið handað frá Monu Nattestad Steintún, audiologopedi, sum hevur hildið á at menna tilfarið í sínum starvi í Sernámi.

Einki standardiserað føroyskt orðblindakanningartilfar við føroyskum normum var tøkt, tá ið Mona Nattestad Steintún og Torgunn Poulsen, sum báðar starvaðust sum audiologopedar í Sernámi, fóru undir at gera orðblindakanningina út frá danska tilfarinum, ið ofta verður nevnt DVO-in. Tær fingu loyvi frá Sernámi at brúka ein part av sínari tíð til hetta arbeiði. Hetta var eitt umfatandi arbeiði, tí danska kanningin kundi ikki bara umsetast, men m.a. skuldi hvør einstøk ljóðskipanarlig fortreyt umframt aðrar grundleggjandi treytir samsvara tí í danska tilfarinum. Alt tilfarið mátti sostatt lagast til føroysk viðurskifti. Eftir hetta varð tilfarið roynt í verki, og hetta var møguligt við vælvild frá fleiri skúlum og lærarum. 

Tilfarið til Orðblindakanningina til 3. flokk umfatar yvirlitskanningarnar, sum skulu gerast av øllum næmingum í byrjanini av 3. flokki, og einstaklingakanningarnar, sum síðani skulu gerast av teimum næmingum, sum stava 8 ella færri tvætliorð rætt. 

Annika Katrin Joensen fegnaðist um týðandi framstigið, at vit nú hava alt tilfarið tøkt á prenti, og segði, at hetta ger tilfarið lættari at brúka. Hon takkaði øllum, sum hava havt ein lut í hesum og hava  stuðlað hesum arbeiði.