Nám hevur nú talgilda faldaran Leiðin til minni rusk, sum Norðurlendska ráðharraráðið hevur gjørt. Talan er um námsfrøðiligt tilfar til lærarar og næmingar í miðdeild og eldri flokkum, ið er tøkt á pallinum Ískoyti.

Tilfarið gevur íblástur og amboð til undirvísing um fyribyrging av burturkasti – eitt evni, sum er alt meira viðkomandi, bæði í Føroyum og á altjóða stigi. Við fýra temum (at fyribyrgja burturkasti, klæði, matur og elektronikkur) verður dentur lagdur á, at næmingar læra at hugsa um tilfeingisnýtslu, endurnýtslu og umhvørvisavbjóðingar – bæði lokalt og globalt.

Tilfarið fevnir um: 

• Læraravegleiðing við didaktiskum innliti og undirvísingartilgongdum
• Uppgávuhefti við “visti tú”-teigum og arbeiðsuppgávum til næmingar
• Uppskot til kanningar og samrøður í nærsamfelagnum

Høvuðsendamálið er at virkja hugburð, ábyrgd og vitan hjá næmingum, so teir fáa eina djúpri fatan av, hvussu teir við egnari atferð kunnu minka um burturkastið í gerandisdegnum.